Vital Albin è daventà la fin d’emna a La Bresse en Frantscha 24avel en la davosa cursa da la cuppa mundiala en questa stagiun. Grazia a quest resultat sut ils top 25 dastga il giuven mountainbiker da 20 onns uss er ir a la partenza al campiunadi mundial da chasa.
Sis Grischuns a la partenza a Lai
Sper Vital Albin è sa chapescha er Nino Schurter nominà per la cursa d’elita. Schurter è il defensur dal titel e vala sco in dals gronds favurits a Lai. Nominà fiss era Corina Gantenbein da Claustra. Ella sto dentant desister sin la cursa da cross-country suenter ch’ella ha survegnì la malsogna da Pfeiffer il cumenzament da la stad. A la partenza da las cursas da downhill dastgan ir gist quatter grischuns. Tar las dunnas èn quai Carolin Gehrig da Flem e Carina Cappellari da Cuira e tar ils umens èn quai Basil Weber e Lutz Weber da Laax.
Tut en tut ha Swiss Cycling nominà 25 atletas e 32 atlets per las diversas cursas da cross-country e da downhill. Ils campiunadis mundials da MTB a Lai èn dals 5 fin ils 9 da settember.
RR sportissimo 12:00
