Siglir tar il cuntegn

Header

cuntegn

Naziunal/Internaziunal Lantsch lantscha stagiun da biatlon

Lantsch ha avert uffizialmain la nova stagiun da passlung e biatlon. Enturn l'arena da biatlon datti numnadamain gia ina loipa da bun 1,5 kilometers lunghezza.

La loipa a Lantsch ha pudì vegnir averta grazia ad in nova tecnologia che sa numna Snowfactory. Igl è ina fabrica da naiv en in container che producescha naiv era tar temperaturas da 10 grads e dapli. Dapi duas emnas èn duas maschinas da la firma TechnoAlpin en funcziun e dapi l'entschatta da november trenescha la naziunala svizra da biatlon a Lantsch.

In gudogn per la regiun ed atlets

Per ils responsabels da l'arena da biatlon enturn il mainafatschenta Silvio Baselgia èsi in project da pilot, in'idea ch'è naschida avant in onn. Cuntents da quest project èn oravant tut ils biatlets svizzers. Quai saja perfect da pudair trenar gia uschè baud sin la naiv, e lura anc a chasa, di il biatlet da Trin Serafin Wiestner.

In zic sceptic da l'entir project è stà a l'entschatta il leader da l'equipa svizra, il Vallesan Benjamin Weger. Oz è el fieu e flomma da la loipa a Lantsch. Quai spargnia era da far gia baud il viadi en il nord da la Scandinavia nua che las relaziuns na sajan savens era betg perfetgas.

Il nov concept da far naiv a Lantsch pussibilitescha era da prolungar la stagiun. En l'avegnir duain vegnir manads atras a Lantsch gia il november camps da trenament per equipas naziunalas ed internaziunalas da biatlon.