Lara Gut vegn sco meglra Svizra 5avla

La slovena Tina Maze gudogna la super cumbinaziun a Beaver Creek e va per sia segunda medaglia d'aur al campiunadi mundial da ski alpin a Vail / Beaver Creek. Lara Gut va dal segund plaz intermediar sin il 5avel plaz final ed è megliera Svizra.

Lara Gut tar la cursa rapida da la supercumbinaziun. Bild in Lightbox öffnen.

Legenda da maletgs: Lara Gut ha mussà ina buna cursa rapida. Suenter il slalom è ella però crudada dal segund plaz intermediar sin il 5av... Keystone

Gia essend campiunessa mundiala en la cursa rapida, e vice-campiunessa mundiala en il super-G è quai il terz titel al campiunadi mundial per la slovena Tina Maze. Las ulteriuras medaglias van a las Austriaccas Nicole Hosp e Michaela Kirchgasser.

Maze va per ses terz titel a Vail

La gronda favurita Tina Maze manava gia suenter la cursa rapida da la cumbinaziun. La finala ha Maze battì Nicole Hosp per 22 tschientavels e Michaela Kirchgasser per 35 tschientavels. Cun Anna Fenninger sco quarta e Kathrin Zettel sco 6avla han duas ulteriuras skiunzas austriaccas pudì persvader.

Gut sco megliera Svizra sin plaz 5

Lara Gut sco 5avla ha pers 94 tschientavels sin Tina Maze e manchentà ina medaglia per 59 tschientavels. Suenter la cursa rapida, sia disciplina da parada, era Lara Gut anc sin il segund plaz intermediar. En il slalom n'ha la Tessinaisa però betg pudì tegnair pitg a las spezialistas dal slalom.

Nufer e Vonn cun medem destin

L'ulteriura svizra Priska Nufer era suenter la rapida sin il plaz 19. En il slalom n'ha ella però betg cuntanschì l'arrivada pli. Betg cuntanschì l'arrivada en il slalom ha era la mattadura locala, l'americana Lindsey Vonn.