Siglir tar il cuntegn

Header

Lara Gut
Legenda: Lara Gut è pronta per las cursas da chasa a Lai e San Murezzan. Keystone
cuntegn

Naziunal/Internaziunal Lara Gut vul la rucla gronda da cristal

Gia quella fin d’emna pudess la skiunza tessinaisa Lara Gut decider il classament general da la cuppa mundiala ed uschia gudagnar per l’emprima giada en sia carriera la rucla gronda da cristal.

Sin sia davosa concurrenta en il cumbat per la rucla gronda da cristal, la Tudestga Viktoria Rebensburg, ha Lara Gut in avantatg da 263 puncts. A las cursas da skis a Lai survegn Gut la schanza da far tut clar.

Sin il program stattan numnadamain duas cursas che schain bain a la skiunza da 24 onns. Tant en il super-g sco er en la super-cumbinaziun è Lara Gut gia stada sisum il podest en questa stagiun. Ed en omaduas disciplinas ha ella anc la schanza da gudagnar la rucla pitschna da cristal.

Gut sa senta bain a Lai

Lara Gut ha propi bunas cartas da sa distanziar anc pli fitg da Viktoria Rebensburg a Lai. Sin la pista Silvano Beltrametti sa senta la Tessinaisa bain.

Tar las davosas cursas a Lai, al final da la cuppa mundiala il 2014, aveva Lara Gut gudagnà tant il super-g sco er la cursa rapida. Motivaziun supplementara dattan plinavant er ils fans da chasa. Las cartas èn pia bunas, schizunt fitg bunas che Lara Gut è l’emprima skiunza svizra dapi Vreni Scheider il 1995 che pudess gudagnar la rucla gronda da cristal.

RTR/aw