Era sche Ambri-Piotta è arrivà cun retard a Tavau pervia da l’aura e la naiv – era la squadra perquai sin il glatsch pli pronta, pli preschenta. L’emprim terz è anc ì a fin senza gols. En il segund terz ha Ambri lura però fatg la differenza e mess la basa per la victoria encunter Tavau. Il topscorer Julius Nättinen ha fatg l’emprim gol, pauc suenter ha Daniele Grassi pudì augmentar. Il HCD ha empruvà da tegnair cunter, dentant senza success.
En il davos terz è la partida lura avanzada ad ina festa da tir. L’emprim ha Ambri augmentà l’avantatg sin 4:0. Pir lura è vegnida la reacziun dal HCD. Il chapitani Andres Ambühl cun ina dubletta ha purtà l’equipa indigena enavos en la partida. Nättinen ha però puspè fatg ina fin a la speranza.
La fin finala ha l’avantatg bastì ad Ambri per gudagnar – cun il resultat final da 4:6. Uschia ha il HCD suenter duas victorias puspè da digerir ina sconfitta.
