Fisicalmain saja ella arrivada ad in punct ch'i na fetschia nagin senn pli, ha Lindsey Vonn ditg en in'intervista a New York. Als gieus olimpics da Pyeongchang, il favrer aveva Vonn anc ditg ch'ella fetschia enavant fin ch'ella possia rumper il record dad Ingemar Stenmark, dad 86 victorias, tuttina quant mal ch'i fetschia.
Sch'jau dumagnass quai, giess in siemi en vigur. Sche betg, hai jau tuttina gì ina carriera cun grond success. Jau sun anc adina la skiunza feminina cun il pli bler success e quai è crai jau schon insatge ch'jau poss esser propi loscha.
Von ha cumenzà sia carriera da skis cun 7 onns. L'emprima medaglia olimpica ha la dunna da 33 onns gudagnà il 2010 a Vancouver. A Pyeoungchang ha ella cuntanschì bronz en la cursa rapida ed è cun quai la pli veglia skiunza che ha dumagnà a gieus olimpics sin il podest. Dals gieus olimpics a Sotchi il 2014 aveva ella stuì desister pervi d'ina blessura dal schanugl che fatschenta anc oz ella.
RR novitads 07:00