Siglir tar il cuntegn
cuntegn

Naziunal/Internaziunal Lindsey Vonn cun in triumf total

La skiunza americana Lindsey Vonn gudogna la davosa cursa rapida da la stagiun a Méribel en Frantscha e cunquai er la culla da cristal en quella disciplina.

La skiunza americana Lindsey Vonn celebrescha sia victoria en l'arrivada da la cursa rapida a Méribel.
Legenda: Lindsey Vonn gudogna a Méribel sia 66avla cursa da la cuppa mundiala. Keystone

Lindsey Vonn ha triumfà en la davosa cursa rapida da la stagiun avant las duas austriacas Elisabeth Görgl e Nicole Hosp. Görgl ha pers 24 tschientavels, Hosp 30 tschientavels sin la dominatura en questa disciplina.

Nagin exploit da las Svizras

Betg pudì tegnair pitg cun las pli spertas han las skiunzas svizras. Cuntanschì in plaz en ils top 10 ha sulet Lara Gut. La Tessinaisa ha pers passa ina secunda ed è vegnida 9avla. Fabienne Suter è vegnida 13avla e Dominique Gisin ha stuì sa cuntentar cun il 16avel plaz.

Ulteriura culla da cristal per Vonn

Grazia a questa victoria gudogna Lindsey Vonn danovamain la culla da cristal en la disciplina cursa rapida, quai gia per la 7avla giada en sia carriera. En la stagiun 2014/2015 ha Vonn gudagnà quest cumbat avant l’austriaca Anna Fenninger e la slovena Tina Maze.

Duel per la culla gronda da cristal resta plain tensiun

En il classament general per la culla gronda da cristal vai piz a cup tranter l’austriaca Anna Fenninger e la slovena Tina Maze. Trais cursas avant la fin da la stagiun maina Fenninger be pli cun 12 puncts avantatg sin Maze. La Slovena è vegnida pli datiers a Fenninger grazia al quart plaz en la cursa rapida da Méribel. Fenninger ha stuì sa cuntentar cun il 8avel plaz.

RR novitads 12:00