Siglir tar il cuntegn
Inhalt

Naziunal/Internaziunal Lindsey Vonn è la regina da las disciplinas spertas

In di suenter il triumf en la cursa rapida gudogna la skiunza americana Lindsey Vonn er il super-G al final da la cuppa mundiala a Méribel en Frantscha. Cunquai gudogna Vonn er la culla pitschna da cristal en quella disciplina.

La skiunza americana Lindsey Vonn cun la culla da cristal enta maun.
Legenda: Ulteriura culla da cristal per la skiunza americana Lindsey Vonn, la dominatura en las disciplinas spertas. Keystone

Igl è gia la 5avla giada che Lindsey Vonn gudogna en sia carriera la disciplina super-G.

Lindsey Vonn ha gudagnà il davos super-G da la stagiun cun in avantatg da 0,49 secundas avant l’Austriaca Anna Fenninger ed 0,80 secundas avant la Slovena Tina Maze. Dada sper il podest giu sco quarta è Tina Weirather dal Principadi dal Liechtenstein.

Trumpada per il trio svizzer

Las skiunzas svizras n’han betg pudì persvader en il super-G da Méribel. Meglra Svizra è Dominique Gisin vegnida sco 12avla cun in retard da bunamain 2 secundas sin Lindsey Vonn. Fabienne Suter è vegnida 14avla e Lara Gut è crudada ora.

Tensiun en il cumbat per la culla gronda da cristal

En il cumbat per la culla gronda da cristal resti gronda tensiun tranter Anna Fenninger e Tina Maze. La skiunza austriaca maina duas cursas avant la fin cun in avantatg da 32 puncts sin la Slovena. Sin il program stattan anc in slalom gigant ed in slalom. Durant che Fenninger è pli ferma en il slalom è Maze pli ferma en il slalom.

RR novitads 12:00