Il HC Losanna ha cuntanschì il final da la cuppa svizra. En l'emprim mez-final ha Losanna battì a chasa ils Kloten Flyers cun 4:3. Per ils Kloten Flyers è quai gia la quarta gia ch'els perdan durant questa stagiun cunter Losanna. Il siemi da cuntanscher il final ha prendì ina fin andetga.
Durant il segund terz è l'equipa Turitgaisa sa dustada cun tutta forza. Robin Leone e Matthias Bieber han curregì il retard da 0:2 entaifer 46 secundas. Losanna ha dentant reagì vehementamain ed ha danovamain dumagnà in avantatg da dus gols. A l'entschatta dal 3. terz ha Kloten anc ina gia pudì vegnir pli datiers a ses adversari - la fin n'ha i dentant betg tanschì per egualisar la partida.
En il segund mez-final da mesemna saira gioga l'SC Berna cunter ils ZSC Lions. La cuppa svizra va a fin ils 3 da favrer.