Naziunal/Internaziunal - Lucien Favre bitta la fautsch en chanvà
Lucien Favre è sa retratg sco trenader dal club da ballape tudestg Borussia Mönchengladbach. El haja reagì sin il mender start ch'il club haja gì insacura en la Bundesliga cun 5 terradas en seria, ha il trenader svizzer ditg.
Il club Borussia Mönchengladbach na vul dentant betg acceptar la demissiun da Favre. Il schef da sport Max Eberl ha ditg ch’els sajan anc adina persvadids che Lucien Favre saja il trenader perfetg per Gladbach, ed els vegnian a dumagnar ensemen cun el la greva situaziun sportiva actuala.
Tenor il president da Gladbach, Rolf Königs, na dettia dentant betg blera speranza da surpledar Favre da far vinavant.
