Il lutgader da Sviz, Martin Grab ha definitivamain prendì doping. Er la prova B dal labor a Losanna haja mussà in resultat positiv. Vegnì chattà saja la substanza scumandada Tamoxifen. Quai scriva Grab en in'atgna communicaziun. Per el na saja però absolutamain betg da declerar, co che la substanza scumandada saja vegnida en ses corp. El saja schoccà dal resultat, na tiria però betg vinavant il cas.
Cunquai dastgass il lutgader da 39 onns ch'è gia sa retratg vegnir serrà.
Tamoxifen
Avrir la boxSerrar la box
Tamoxifen vegn duvrà per mitigiar effects secundars dad anabolica – preparats per furmar musclas. Gist en in sport da forza sco lutga promovan anabolica fitg ferm la prestaziun. Tamoxifen è dapi 13 onns sin la glista da las substanzas scumandadas da l'organisaziun mundiala cunter doping WADA. En la medischina vegn Tamoxifen duvrà per cumbatter cancer dal sain.
