En la cursa rapida en Val Gardena ha Gisin pers la controlla curt avant in sigl. El è crudà grevamain ed ha stuì vegnir transportà cun helicopter en l'ospital. Quant grev che l'um dad Engelberg è blessà n'è anc betg enconuschent. Swiss Ski ha sulet communitgà ch'el saja stabil e vegnia transportà en Svizra per ulteriuras consultaziuns. Diagnosas exactas da sias blessuras spetga Swiss Ski dumengia suentermezgi.
L'accident dad oz fa endament l'accident che Gisin ha gì gia avant quatter onns a Kitzbühel. Là era el er crudà grevamain ed era sa blessà vi dal chau.
Plazza trais per Beat Feuz
Gudagnà la cursa da Val Gardena ha il Norvegiais Aleksander Kilde. Quai cun grond avantatg sin l’Austriac Max Franz ed il Svizzer Beat Feuz. Mauro Caviezel suonda sin il 8avel plaz.
- 1. Aleksander Kilde da la Norvegia 1:56.13
- 2. Max Franz da l'Austria + 0.86
- 3. Beat Feuz da la Svizra + 0.92
RR novitads 14:00+