Marcel Hirscher ha mussà in cursa quasi perfetga ed ha la finala sco quart pers be 0,09 secundas sin il victur, il Canadais Dustin Cook. Cunquai gudogna Hirscher 50 puncts. En il classament general maina l’Austriac duas cursas avant la fin cun 34 puncts avant Jansrud. Il Norvegiais che gudogna la culla pitschna da cristal en la disciplina super-G è vegnì a Méribel segund.
Sin il program al final da la cuppa mundiala stattan anc in slalom gigant ed in slalom. Igl è las duas disciplinas da parada da Marcel Hirscher. Cunquai vegn l’Austriac pli probabel a gudagnar per la quarta giada en seria il classament general.
Premiera per Dustin Cook
Gudagnà il davos super-G da la stagiun ha Dustin Cook. Il skiunz canadais che veva gia gudagnà argient en questa disciplina al campiunadi mundial a Vail/Beaver Creek, ha triumfà a Méribel 0,05 secundas avant Jasrud e 0,08 secundas avant il franzos Brice Roger. Per Dustin Cook èsi l’emprima victoria da la carriera en la cuppa mundiala da skis.
Mauro Caviezel cun top resultat
Meglier skiunz svizzer è stà Mauro Caviezel. Il Grischun è vegnì 5avel cun in retard da sulet 0,11 secundas sin Dustin Cook ed ha uschia realisà ses meglier resultat en la cuppa mundiala. In plaz en ils top 10 hai er dà per Beat Feuz. Il Bernais è vegnì 9avel. Patrick Küng ha stuì sa cuntentar cun il 22avel plaz e Carlo Janka è crudà ora.
Didier Défago di adia
Ina buna prestaziun ha er Didier Défago mussà a la fin da sia carriera. En sia davosa cursa è Défago vegnì 12avel. Il campiun olimpic da Vancouver en la cursa rapida e victur dals classichers dal Lauberhorn e Kitzbühel il 2009 ha dà adia al circus da skis a Méribel.
RR novitads 11:00