Naziunal/Internaziunal - Marit Björgen fa pausa da pop
La passlunghista norvegiaisa Marit Björgen vegn a far ina pausa questa stagiun. Il december spetga ella ses emprim pop e fa perquai ina pausa. Sche tut giaja bain veglia ella turnar enavos il 2017, uschia Björgen envers medias norvegiaisas.
En sia carriera ha Björgen fin uss gia gudagnà 6 medaglias d’aur tar ils gieus olimpics. Tar quellas vegnan 14 titels da campiunadi mundial e 102 victorias tar cursas da la cuppa mundialia.
L’enviern passà aveva Björgen segirà il classament general da la cuppa mundiala per la quarta giada.