Siglir tar il cuntegn
cuntegn

Naziunal/Internaziunal Mauro Caviezel manchenta mo per pauc il podest

En la cumbinaziun a Wengen daventa Caviezel quart. Marco Schwarz gudogna avant Victor Muffat-Jeandet ed Alexis Pinturault.

La cursa da Mauro Caviezel

Il podest

  1. Marco Schwarz, Austria 2:36,92
  2. Victor Muffat-Jeandet, Frantscha +0,42
  3. Alexis Pinturault, Frantscha +1,12

L'Austriac e spezialist da slalom Marco Schwarz po uschia festivar sia segunda victoria en ina cursa da la cuppa mundiala. L'entschatta da l'onn ha el gia gudagnà ad Oslo la cursa parallela. A Wengen ha Schwarz uss gudagnà avant il victur da l'onn passà, Victor Muffat-Jeandet e Alexis Pinturault, omadus da la Frantscha.

Ils Svizzers

Mauro Caviezel ha manchentà mo per 11 tschientavels secunda in plaz sin il podest ed è daventà quart. Sper Mauro Caviezel ha er il Surmiran Sandro Simonet mussà ina fitg buna prestaziun en la cumbinaziun a Wengen. El ch'era suenter il slalom anc sin plaz 8 è la finala daventà 11avel.

  • 4. Mauro Caviezel + 1,23
  • 11. Sandro Simonet + 2,45
  • 16. Carlo Janka + 3,14
  • 17. Luca Aerni + 3,22
  • 19. Nils Hintermann + 3,53
  • 23. Stefan Rogentin + 4,24
  • 26. Gilles Roulin + 4,62

Bunas prestaziuns da Caviezel e Simonet en il slalom

Il spezialist da speed grischun Mauro Caviezel ha mussà ina buna prestaziun en il slalom da la cumbinaziun a Wengen. El ha pers 1,6 secundas sin l'emprim, l'Austriac Marco Schwarz. Uschia ha Caviezel gì ina buna situaziun da partenza per la segunda part da la cumbinaziun dal suentermezdi.

Sper Marco Schwarz han er ils dus Franzos Alexis Pinturault e Victor Muffat-Jeandet gì bunas premissas. Els èn vegnids en il slalom sin plaz dus e trais. Er ina buna prestaziun ha mussà il Surmiran Sandro Simonet. Malgrà che la pista era gia marcada in zic èsi reussì ad el da sa classar sin plaz 8 en l'emprima cursa.

Resultats dal slalom dals ulteriurs Svizzers:

  • 16. Luca Aerni
  • 20. Niels Hintermann
  • 23. Carlo Janka
  • 27. Gilles Roulin
  • 29. Stefan Rogentin

RR novitads 11:30