Era per la segunda cursa da la cuppa mundiala a Nove Mesto en Tschechia è Jolanda Neff pronta, quai ha ella mussà en il shorttrack nua che Neff è vegnida terza. Quest prolog che vegn mintgamai manà atras dus dis avant la cursa da cross-country decida er en tge retscha ch’ins po ir a la partenza a la cursa roiala.
Campiunadi mundial 2019 e gieus olimpics 2020
La gronda finamira da Jolanda Neff en la stagiun 2019 è la cursa dal campiunadi mundial la fin avust a Mont Saint-Anne en il Canada. Questa cursa vala sco ina da las pli pretensiusas e tecnicas en l’entir circus da mountainbike, ina cursa che schai bain a Jolanda Neff. Là vul ella gudagnar enavos il tricot da campiunessa mundiala ch’ella ha dastgà purtar durant la stagiun passada sco campiunessa mundiala dal 2017. A lunga vista stattan gia ils proxims gieus olimpics en il center. Sa qualifitgar e lura far furora a Tokio la stad 2020, quai il siemi da Jolanda Neff, l’actual grond trumf svizzer en la scena da mountainbike.
Nino Schurter quart en il shorttrack a Nove Mesto
Suenter ses 6avel plaz en l’emprima cursa da la cuppa mundiala en questa stagiun ad Albstadt en Germania vul Nino Schurter mussar ina reacziun a Nove Mesto en Tschechia. En il shorttrack dal venderdi è Schurter vegnì quart ed dastga uschia parter da l’emprima retscha per la cursa da cross-country da la dumengia. Gudagnà quest prolog ha sco gia ad Albstadt l’Ollandais Mathieu van der Poel, il giuven talent che vala sco il pli grond rival da Nino Schurter.
RR Sportissimo 17:00