Siglir tar il cuntegn

Header

Navigaziun

cuntegn

Mountainbike Vital Albin ed Ursin Spescha avant il campiunadi europeic

Il duo sursilvan en il cader svizzer sa legra sin il campiunadi europeic en Tschechia. Bain ch'ina EM n'ha betg quella muntada en il sport da mountainbike. Lur gronda finamira da la stagiun è atgnamain il campiunadi mundial ch'è il settember en Canada.

(da sanestra): Ursin Spescha ed Vital Albin.
Legenda: (da sanester): Ursin Spescha e Vital Albin en acziun. MAD/Thömus Team

Fin uss è la stagiun stada in pau in si e giu per Vital Albin ed Ursin Spescha en la categoria dals U23. En la seria Swiss Bike Cup, nua ch'ils U23 partan da nov cun l'elita, è Vital Albin vegnì trais giadas en ils top 10 ed ha mussà ch'el po tegnair pitg als megliers dal mund. Insumma betg cuntent è il mountainbiker da Tersnaus cun las emprimas cursas da la stagiun en la cuppa mundiala. Ed er al campiunadi svizzer leva el ir sin il podest, è la finala vegnì be 8avel. Malgrà esser disciplinà e trenar adina pli dir, èn ils resultats adina vegnids menders. Quai ha frustrà ed el ha stuì emprender da dosar.

Quai è dentant sa cumprovà. En l'ultima cursa da la cuppa mundiala è Vital Albin vegnì 13avel. In resultat che dat confidenza per il campiunadi europeic, las proximas cursas da la cuppa mundiala en Val di Sole ed a Lai e surtut per il punct culminant: il campiunadi mundial da mountainbike en il Canada. Per il campiunadi europeic en Tschechia, sin in cumplet nov percurs, è el realistic. Ina plazza tranter ils emprims 10, e Vital Albin è cuntent.

Ursin Spescha avant sia premiera

Ils ultims dus onns n'hai betg tanschì al mountainbiker da Sevgein dad ir ad in campiunadi europeic u ad in campiunadi mundial en la categoria U23. Tant pli sa legra el uss sin la cursa en Tschechia. Sin fundament dals resultats en questa stagiun saja in plaz tranter ils emprims 20 realistic. Era sch'i n'ha en la seria dal Swiss Bike Cup mai tanschì per in resultat en ils top 10 è Ursin Spescha cuntent, cunquai ch'ils sut 23 partan là cun l'elita.

Ch'el ha gia profità da sia emprima stagiun en la nova equipa da profis Thömus mussan ses resultats en la cuppa mundiala. Il pli losch è Spescha sin ses 12avel plaz, gist al cumenzament da la stagiun. Amez la stagiun ha lura in infect frenà il giuven da 21 onns. Tar l'ultim grond test avant il campiunadi europeic, la cursa da la cuppa mundiala, avant 10 dis en Frantscha, ha quest infect sfurzà el da dar si. Avant che parter per il campiunadi europeic di Ursin Spescha, ch'el sa sentia puspè bain ed haja era pudì trenar bain quest'emna.

Anc in quint avert

Er sche la cursa europeica è sia emprima sco U23, ses focus èn las proximas cursas da la cuppa mundiala e suenter il campiunadi mundial. Surtut en vista a la cursa da la cuppa mundiala a Lai ha Spescha anc in quint avert, cunquai ch'el n'ha betg pudì partir l'onn passà a Lai.

RR Sportissimo 17:00