GC fa vegnir enavos l'attatgader israelian Munas Dabbur. Il ballapedist da 24 onns ha bandunà ils Grasshoppers la stad passada per 6 milliuns euros en direcziun Austria, tar Red Bull Salzburg.
Dus goals per RB Salzburg, 49 per GC
Dabbur rinforza GC per il rest da la stagiun. A Salzburg n'aveva il attatgader betg bler success. En l'emprim onn en la bundesliga austriaca ha el mo sajettà dus goals. Per GC aveva el tutgà en 92 gieus 49 giadas ed era en la davosa stagiun cun 19 goals champiun da goals da la super league.
E GC po duvrar la fermezza da Dabbur da sajettar goals. Il club ha cumenzà cun duas terradas suenter la pausa d'enviern. Dals ultims 10 gieus da la liga hani gudagnà sulet in ed en ils emprims gieus suenter la pausa d'enviern n'han els fatg nagins goals.
RR novitads 17:00