Siglir tar il cuntegn

Naziunal/Internaziunal Mustér sut tschiel plain parasguladers

Quels dis domineschan ils parasguladers en la regiun da Mustér. Miran ins a tschiel vesan ins di per di passa tschient parasguladers en l’aria.

Legende: Video Di per di passa 100 parasguladers en il tschiel sur Mustér abspielen. Laufzeit 1:02 Minuten.
Or da sil punct dals 29.07.2016.

Dals 27 da fanadur fin l'emprim d’avust è a Mustér il campiunadi svizzer da parasgular, il Disentis Open. Bun 160 persunas eran s’annunziadas per quest eveniment, la finala èn anc bun 115 parasguladers vegnids a Mustér sisum la Cadi. Tut en tut vegnan quels da bun 20 naziuns. La gronda part èn svizzers che cumbattan per il titel da campiun svizzer. Dasperas hai oravant tut er blers participants da la Frantscha.

Da post tar post

Mintga di vegn dà avant ina ruta cun plirs posts. La partenza è a Gendusas en il territori da skis da Mustér sin passa 2’000 meters sur mar. Cura che tuts sa chattan ina gia en l’aria vegn dà liber la partenza. Cun agid da GPS vegn lura sgulà da post tar post. Ina ruta pussaivla è per exempel da sgular da Gendusas sin il Pass Alpsura, enavos fin a Breil, lura direcziun Plaun la Greina ed enavos a Mustér. Quel che sa tschenta sco emprim al Sax sisum il vitg da Mustér ha gudagnà la cursa dal di. La distanza po esser fin a 100 kilometers e cun agid dal vent sgolan ils parasguladers magari fin ad 80/90 kilometers l’ura.

Zonas da protecziun

Tabu è da sgular en las zonas da protecziun. Questas zonas èn fatgas oravant tut per proteger la selvaschina. Sa tschenta in parasgulader tuttina en ina tala zona vegn el chastià. Pia èn ils parasguladers obligads da guntgir talas zonas, er per betg vegnir en dispita cun ils chatschaders.

Stefan Wyss, Michael Maurer e Stephan Morgenthaler
Legenda: Stefan Wyss gudogna avant Michael Maurer (san.) e Stephan Morgenthaler (dretg). mad

Wyss per la 5avla gia campiun svizzer

Suenter quatter da sis etappas ha il Disentis Open stuì vegnir interrut pervia da l’aura. Cunquai gudogna Stefan Wyss da Ringgenberg en la vischinanza dad Interlaken il titel da campiun svizzer en parasgular. Wyss è stà sur tut ils dis il meglier pilot ed el ha oravant tut er gudagnà l’etappa roiala ch’ha manà la sonda da Mustér sur Flem e Cuira fin a Schiers. La finala ha il sportist da 40 onns triumfà avant Michael Maurer e Stephan Morgenthaler. Per Wyss èsi suenter il 2009, 2011, 2012 ed il 2015 gia il 5avel titel da campiun svizzer en sia carriera da parasgular. Tar las dunnas ha gudagnà Nanda Walliser da Niderbipp.

Dapli infurmaziuns sut: http://www.disentis-open.ch, il link avra en ina nova fanestra