Questa giada n'hai betg dà ina blamascha per Tavau en l'emprima runda da la cuppa svizra: Mesemna saira han ils da Tavau battì l'EHC Dübendorf gist cun 10:2.
Er ils ulteriurs clubs da la liga naziunala A han mintgamai gudagnà lur partidas cun clers resultats.
Blamascha avant 2 onns
Il 2015 ha l’equipa da Dübendorf battì il HCD en l’emprima runda da la Cuppa Svizra sensaziunal cun 5:4 suenter la prolungaziun. La blamascha ord vista da Tavau, meglier detg la sensaziun ord vista da Dübendorf è uschia stada perfetga. Anc fin curt avant la fin dal gieu parevi sco sche l’equipa d’Arno del Curto vegniss anc da mitschar cun in egl blau. Mo lura han ils Turitgais d’emprima liga mess la halla sin il chau, l’emprim cun egualisar la partida e lura cun sajettar strusch che la prolungaziun ha cumenzà il 5:4.
Uras per far revantscha
Malgrà ch’il HCD aveva laschà a chasa ils megliers giugaders e fatg il viadi a Dübendorf be cun la segunda garda è l’equipa d’Arno del Curto sa blamada quella saira a Dübendorf. Gia l’onn avant aveva Tavau pers gia en la segunda da la Cuppa Svizra, lura encunter il club vallesan da Visp.
Ussa, dus onns suenter la terrada a Dübendorf survegn il HCD la schanza da far revantscha. Il gieu tranter Dübendorf ed il Club da hockey da Tavau cumenza questa saira a las 20:00 uras.
RR actualitad 17:00
