Che quai na vegnia betg ina spassegiada sin questa plazza artifiziala ad Andorra eran ils Svizzers conscients. Ch’il gieu encunter ils Andorrans vegni dentant uschè dirs, da gliez han ils pli paucs quintà. Andorra ha giugà fitg defensiv e destruì il gieu dals Svizzers, malgrà che la Svizra è stada passa 70% en possess da la balla. La finala hai tuttina tanschì da batter la pitschna naziun da las Pireneas.
Fabian Schär ha manà la Svizra cun 1:0 en avantatg, quai entras in penalti en la 19avla minuta. En la 77avla minuta ha Admir lura tuc cun il chau al 2:0. En la 90avla minuta è Andorra vegnì da sajettar il gol d’onur entras in sajet da distanza dal joker Alexandre Martinez.
Quai che quinta èn ils 3 puncts
La fin finala quinta però sulettamain la victoria. Cun trais victorias en seria è la Svizra partida uschè bain sco anc mai en in campagna da qualificaziun per in campiunadi mundial. L’equipa da Vladimir Petkovic figurescha a la testa da la tabella cun 9 puncts, 3 puncts avant il Portugal ch’ha battì las Inslas Feroe cun 6:0. L’Ungaria ha battì la Lettonia cun 2:0 ed ha uschia 4 puncts sin il conto.
Il proxim gieu da qualificaziun dat la squadra naziunala la dumengia, ils 13 da november, a Lucerna encunter las Inslas Feroe.
RR novitads 06:00