Curt avant che cumenzar il gieu en il Brügglifeld èn las glischs idas ora in'emprima giada. Suenter var mes'ura han Aarau ed il FCZ lura pudì cumenzar a dar. Dentant mo 26 secundas suenter il tschivel han las glischs puspè disditg. La finala han ils responsabels stuì dir giu definitivamain il gieu suenter trais quarts d’ura.
Ina simpla raschun
Ils transfurmaturs n'hajan betg lavurà en urden, ha infurmà il president dal FC Aarau Alfred Schmid. Fastizs da sabotascha u manipulaziun n’hajan els betg chattà.
Consequenzas anc betg cleras
Anc n'ha la Federaziun svizra da ballape betg decidì, co quintar il gieu. Pussaivla fiss ina victoria da forfait da 3:0 per ils da Turitg. Il president dal club indigen spera dentant sin ina repetiziun dal gieu. Il reglament prevesa ina tala, sche ‘ina partida na po betg vegnir giugada a fin, senza ch’ina u tschella da las equipas èn la culpa’.
RR novitads 22:00