Ils 16 da settember aveva Losanna gudagnà ordaifer cunter Tavau cun 6:4. Gia suenter 40 minutas stevi 5:0. Trais mais pli tard han ils da Tavau fatg tras anc ina giada il medem scenari. Il HCD n’è betg vegnì sin turas en la partida cunter ils Romands. Gia suenter 155 secundas ha Joel Genazzi purtà l’avantatg a Losanna.
Quarta terrada a chasa
Tavau ha giugà surtut en la fasa da partenza a moda desolata ed ha incassà gia per la quarta giada ina dira terrada a chasa. Sper Losanna avevan gia Servette, Ambri e Berna declassà il HCD.
Per ina buna chaussa
Il gieu da questa saira è stà il terz gieu da beneficenza per la fundaziun Greenhope. Tavau ha giugà en tricots verd-nairs e Losanna en tricots verd-alvs. Suenter la partida èn ils tricots vegnids ingiantads. Il retgav va a la fundaziun Greenhope en favur dad uffants cun cancer.
Hockey – Liga naziunala A 2017 / 2018 32avla runda