Siglir tar il cuntegn
Inhalt

Naziunal/Internaziunal Nauscha paja per l'FC Lucerna

En il gieu da qualificaziun per l'Europa League ha l'FC Lucerna realisà a chasa in pari dad 1:1 cunter il club talian US Sassuolo. Mesirà vid las schanzas e la cumpart al gieu avessen ils Lucernais merità la victoria.

dus ballapedists cumbattan per la balla
Legenda: Alfred Joseph Duncan (dretg) da Sassuolo en il cumbat cun Nicolas Haas da l'FC Lucerna. Keystone

Lucerna manava suenter 8 minutas gia cun 1:0. Curt avant la pausa ha Berardi egualisà per il club da la seria A grazia ad in penalti. Figura tragica tar l'FC Lucerna è stà Markus Neumayr. En la tschintgavla minuta ha el tutgà sulet la latta ed en la segunda mesadad n'ha el betg realisà in penalti.

Ventira tardiva per GC

Ils Grasshoppers da Turitg perencunter han gudagnà a chasa cunter il club da la Cipra Apollon Limassol cun 2:1. Il gol decisiv è crudà pir en la 93avla minuta. Lavanchy ha fatg il gol en il temp supplementar. En l'indeschavla minuta ha Tabakovic sajettà il 1:0 per GC. Suenter ha il club da Turitg manchentà la decisiun preliminara. Encunter il decurs dal gieu ha Gneki pudì egualisar en la 76avla minuta.

Ils gieus da return èn gievgia ils 5-08-2016.

RR novitads 22:00