Siglir tar il cuntegn
cuntegn

Naziunal/Internaziunal Neff 6avla en cumenzament da stagiun

Dasper ella èn er anc Linda Indergand ed Alessandra Keller vegnidas en las top 10.

Purtret da Jolanda Neff.
Legenda: Purtret da Jolanda Neff durant ina cursa da la Cuppa mundiala. Keystone

Be il schaner ha Jolanda Neff gì in'operaziun da l'oss clavigl ed ina fractura dal cumbel. Tant pli èsi da smirvegliar che la campiunessa mundiala è gia puspè en furma.

Tar l'emprima cursa da Cross-Contry da la nova stagiun da la cuppa mundiala a Stellenbosch, en Sidafrica è Neff dentant sa tschentada dasper il podest. Curt avant l'arrivada è ella anc vegnida vargada da duas concurrentas ed è sa classada sin il 6avel plaz. Ella ha pers 1:16 minutas sin la victura Annika Langvad dal Danemark.

Trais Svizras en las top 10

Cun Linda Indergand (9.) ed Alessandra Keller (10.) èn er duas ulteriuras Svizras sa classadas en las top 10. La proxima cursa da la cuppa mundiala ha lieu pir en 10 emnas ad Albstadt.

RR novitads 15:00