Siglir tar il cuntegn

Naziunal/Internaziunal Nino Schurter n'è betg campiun svizzer da mountainbike

Pervia d'in defect n'ha el gì nagina schanza e stuì sa cuntentar cun la quarta plazza. Campiun svizzer è Mathias Flückiger.

Nino Schurter sin ses mountainbike
Legenda: Situaziun nunusitada per Nino Schurter. El n'è betg daventà campiun svizzer da mountainbike. Keystone

Il campiun olimpic e mundial Nino Schurter turna senza medaglia dals campiunadis svizzers da mountainbike ad Andermatt/Ursera. Suenter in defect gia en l'emprima runda ha il mountainbiker da Tersnaus pers ton temp ch'el ha giu nagina schanza pli da cumbatter per las medaglias. Nino Schurter ha stuì sa cuntentar cun il quart plaz.

Niev campiun svizzer da mountainbike è Mathias Flückiger ch'ha gudagnà piz a cup en il sprint final avant Florian Vogel. Terz ei Andri Frischknecht cun in retard da 17 secundas. Il fegl da la legenda da mountainbike Thomas Frischknecht è gist anc vegnì da mitschar curt avant Nino Schurter sur la lingia d'arrivada.

A Nino Schurter n'èsi betg reussì da turnar cun ina medaglia. Persuenter ha ses convischin da Tersnaus dumagnà quai. Vital Albin è vegnì terzs en la categoria dals U23. Avant Albin è Joris Ryf vegnì segund. Filippo Colombo ha defendì ses titel da campiun svizzer dils U23. Ursin Spescha da Sevgein è vegnì setavel.

Jolanda Neff campiunessa svizra

Neff ha dominà la concurrenza ad Andermatt/Ursera ed ha gudagnà cun in avantatg da varga duas minutas e mesa sin Ramona Forchini e da varga trais minutas sin Linda Indergand.

RR sportissimo 17:00