Per il gieu cunter ils SCL Tigers ha Tavau stuì desister da set giugaders pervia da blessuras (Ambühl, Dino Wieser, Du Bois, Corvi, Paschoud, Bader e Baumgartner). Plinavant èn cun Perttu Lindgren ed Aaron Palushaj dus giugaders da l’exteriur vegnids schanegiads.
En l’emprim terz han ils fans vesì in gieu cun paucas interrupziuns, dentant er cun paucas grondas occasiuns per las duas equipas. Il 1:0 per ils Tigers entras Elo Eero è crudà in zic ord il nagut.
En avantatg en il segund terz
Ina partenza perfetga ha Tavau gì en il segund terz. En powerplay ha Otso Rantakari tutgà suenter ina minuta tar il 1:1 cun in bellezza sajet da la lingia blaua. Mo paucas secundas pli tard ha Oliver Heinen sajettà en avantatg ils Grischuns. Malgrà che Langnau ha silsuenter smatgà cun vehemenza sin il gol da Tavau èsi restà tar il 2:1 suenter 40 minutas.
Tigers han fatg squitsch
En l’ultim terz han ils SCL Tigers vinavant empruvà da far squitsch, l’emprim gol ha dentant il HCD sajettà en la 45avla minuta entras Chris Egli. Gist en la fasa nua ch’ins aveva il sentiment che Tavau ha sut controlla il gieu, èn ils Tigers vegnids tar il segund gol da la saira. En la 53avla ha Eero Elo scursanì sin 2:3 ord vista dals Bernais e quai cun in giugader pli pauc. Il segund gol da Chris Egli en la 58avla minuta è dentant stà la decisiun en favur dals Grischuns. Curta avant la fin ha Fabrice Herzog anc tutgà tar il 5:2 en il gol vit.
Suenter duas terradas è il HCD uschia turnà enavos sin la via da success.
Hockey tabella liga naziunala A
gieus | gols | puncts | ||
1. | Zug | 49 | 146:120 | 90 |
2. | ZSC Lions | 49 | 162:123 | 88 |
3. | Tavau | 49 | 154:139 | 86 |
4. | Genevra | 49 | 134:115 | 86 |
5. | Bienna | 49 | 149:140 | 78 |
6. | Friburg | 49 | 121:130 | 73 |
7. | Losanna | 49 | 133:129 | 72 |
8. | Lugano | 49 | 124:135 | 69 |
9. | Berna | 49 | 129:139 | 68 |
10. | Ambri | 49 | 116:135 | 60 |
11. | SCL Tigers | 49 | 113:146 | 60 |
12. | Lakers | 49 | 126:156 | 52 |
Ils resultats da las ulteriuras partidas:
- Berna – Lakers 5:2
- Friburg – Lugano 6:3
- Genevra – Zug 3:1
- Losanna – Bienna 2:3
- ZSC Lions – Ambri 3:1
RTR novitads 23:00