Il victur dal Tour de Ski passà, il passlunghist Dario Cologna, ha finì las rundas da k.o. sco sesavel svizzer e manchenta perquai ils quartfinals. Il sprint final da la sonda ha gudagnà cun Johannes Hösflot Klaebo in dals favurits.
Per Cologna vul quai dir ch'el perda secundas da bonus e vegn ad avair uschia ina partenza pli dira en il Tour de ski che ses cunfavurits Johannes Hösflot Klaebo, Emil Iversen u Martin Johnsrud Sundby.
Nagin exploit svizzer er tar ils auters
Per ils dus svizzers Jovian Hediger e Jason Rüesch era l'emprim di da cursa terminà suenter ils quartfinals – quai malgrà ch'els eran sa qualifitgads cun buns resultats: Hediger cun in suveran 20avel rang e Rüesch cun medemamain fitg buna prestaziun sin il 26avel rang.
Tar las dunnas ha gudagnà la Svedaisa Stina Nilsson. Laurien van der Graaff ha procurà per il meglier resultat svizzer. Ella è rivada en il mezfinal e quai sin rang 11. Per Nadine Fähndrich era a fin la cursa en il quartfinal e Nathalie von Siebenthal è vegnida 46avla.
Il victur e la victura cun cumenzament main reussì
Sco al victur tar ils umens, a Dario Cologna, n'èsi er betg gartegià a la meglra dunna da l'ultim Tour de Ski, a Heidi Weng, dad avair in bun start en il Tour de ski actual: Weng ha fatg plazza 42 e manchenta uschia er ils quartfinals.
RR novitads 14:00+
