Suenter avair gudagnà la mini-tura a Kuusamo l'emna passada, ha la passlunghista norvegiaisa Therese Johaug er dominà il skiatlon a Lillehammer. La curridra da 31 onns ha gudagnà cun in avantatg da passa ina minuta sin la segunda, l'Americana Jessica Diggins. Per Johaug è quai la 57avla victoria en la cuppa mundiala. Plaz 3 ha fatg Heidi Weng cun 1:19 retard, in'ulteriura Norvegiaisa. Svizras n'èn betg stadas al start.
Bolschunow avant 5 Norvegiais
Tar ils umens gudogna il Russ Alexander Bolschunow il skiatlon avant ils Norvegiais Hans Christer Holund ed Emil Iversen. Cun quai ha Bolschunow pudì impedir la victoria totala dals Norvegiais. Davos Hans Christer Holund ed Emil Iversen èn numnadamain suandads trais ulterius Norvegiais: Johannes Kläbo, Martin Johnsrud Sundby e Sjur Röthe.
Meglier Svizzer è Jason Rüesch sin plazza 22 cun radund 3 minutas retard. Jonas Baumann è 31avel.
RTR novitads 14:00