Siglir tar il cuntegn

Header

cuntegn

Passlung Planoiras 2021 en furma digitala

La 36avla ediziun dal Planoiras, la cursa populara da passlung a Lai, n’ha betg lieu sco usità quest onn. La raschun è sco tar bleras autras occurrenzas da sport las mesiras strictas encunter la pandemia da Corona.

Tuttina han ils organisaturs elavurà las davosas emnas vid ina ediziun digitala dal Planoiras per uschia tuttina porscher ad in e scadin ina cursa er quest onn. La cursa digitala vegn manada atras dals 17 da schaner fin ils 7 da favrer 2021.

Temp vegn mesirà via GPS

La cursa digitala dal 36avel Plonoiras n’è deplorablamain betg pussibla da realisar sin il tschancun original. Uschia maina questa cursa da l’Arena da biatlon fin a Lai e puspè enavos en l’Arena da biatlon. Ils curriders pon decider tranter ina cursa da 23,5 kilometers (duas rundas) u ina cursa da 12 kilometers (ina runda). Omaduas cursas dumbran sco usità tar la seria da cursas Swiss Loppet Challenge.

Per la mesiraziun dal temp è mintga currider sez responsabel. Quella vegn prendida cun ina ura da GPS u cun ina app al telefonin sco per exempel l’app Strava. Silsuenter po mintgin chargiar las datas sin la pagina d’internet da la cursa Planoiras. Là vegn er adina puspè actualisada la rangaziun. La partenza è gratuita.

L’onn passà tar l’ediziun da giubileum avevan Ilya Chernousov triumfà tar ils umens e Seraina Kaufmann tar las dunnas.

Artitgels legids il pli savens