Siglir tar il cuntegn

Naziunal/Internaziunal Per il HCD è la stagiun a fin

Il club da hockey da Tavau perda a chasa cunter Bienna cun 2:5 – ed uschia è la stagiun a fin per ils Grischuns. E Bienna cuntanscha per l'emprima giada dapi 28 onns puspè in mezfinal dals playoffs.

Legende: Audio Bunura: Per il HCD è la stagiun a fin abspielen.
2:04 min, Actualitad dals 23.03.2018.

Vis sur tut las 60 minutas ha Bienna pudì far dapli pressiun ch'ils da Tavau en questa partida decisiva. Bain ha Dino Wieser pudì egualisar en la 23avla minuta al 1:1, mabain en il decurs dal segund terz han ils da Bienna era marcà trais ulteriurs gols al resultat intermediar da 1:4. A Samuel Walser èsi lura anc gartegià da scursanir al 2:4 en la 45avla minuta, malgrà far in pau dapli pressiun n'ha il HCD dentant betg pli pudì volver la partida.

Ditg ha Bienna stuì spetgar

Uschia ha la 6avla partida purtà la decisiun, il EHC Bienna fa cun 4:2 victorias il pass en il mezfinal dals playoffs. Là fruntan ils da Bienna davent da mardi che vegn sin Lugano. En il segund mezfinal sa mesiran Berna ed ils ZSC Lions.

Inconstanza è stà la suletta constanza dal HCD

La stagiun 2017/2018 è per Tavau stà in zic sco in carussel dad otg. Igl è stà in si e giu. Tenor il trenader Arno Del Curto haja sia equipa mussà durant l’entira stagiun oravant tut bunas prestaziuns encunter equipas fermas sco Berna u Lugano. Encunter las equipas a la cua da la tabella haja l’equipa savens dentant era dà fitg schlets gieus.

La fin finala hajan ins era gì memia blers giugaders blessads. En ils playoffs ha il capitani Andres Ambühl ed era il defensur rutinà Noah Schneeberger mancà. Uschia èn blers giugaders giuvens vegnì en l’equipa durant la fasa decisiva. Sut quellas circumstanzas n'hajans betg dastgà spetgà miraclas, declera Arno Del Curto.

RR Sportissimo 17:00