Siglir tar il cuntegn

Header

cuntegn

Pervi da la crisa da corona Stagiun dad American Football è stritgada

Ils Calanda Broncos na pon betg defender il titel. En Svizra datti questa stagiun naginas partidas dad American Football.

Sco ina da las emprimas ligas en Svizra ha la federaziun svizra dad American Football decis da stritgar l’entira stagiun da la liga naziunala A. La meglra equipa dals ultims onns, ils Calanda Broncos, na pon uschia betg defender lur titel da campiun svizzer. L’equipa grischuna avess gì la schanza da gudagnar il titel gia per la quarta giada en seria.

Decisiun unanima

Las sis equipas da la liga naziunala A dad American Football eran tuttas d’accord. Pervia dal coronavirus n'èsi questa stagiun betg pussaivel da dar quest sport. Pervia da las restricziuns l’emprim dal chantun Grischun e da la citad da Cuira, lura dentant era dal Cussegl federal, era la nova stagiun a fin avant sco ch’ella ha propi cumenzà. La fin da mars avess la nova stagiun stuì ir liber. Cun quai na egl uss nagut.

Spustar il campiunadi na era betg propi in tema

Anc avant che la liga naziunala ha decis da stritgar quest onn l’entira stagiun dad American Football, hai anc dà la discussiun dad in eventual spustament. Quella discussiun è dentant spert stada a fin. Per il mument n'èsi era betg pussaivel da trenar American Football. Uschia ch'i era nagina opziun da spustar la stagiun sin la segunda mesadad da l’onn.

Per ils juniors datti anc ina pitschna speranza. La stagiun dals juniors U16 cumenza tradiziunalmain pli tard. Quella stagiun n'è anc betg stritgada.

RTR Sportissimo 17:00

Artitgels legids il pli savens

Scrollar a sanestra Scrollar a dretga