Puspè ina giada in campiunadi mundial da hockey en Svizra. L’eveniment grond il matg avess stuì vegni ina gronda festa da hockey. Suenter passa diesch onns fiss l’elita dal mund da hockey puspè stada ina giada en Svizra. Or da tut quels siemis na vegn però pervia dal coronavirus nagut. Avant trais emnas ha la Federaziun internaziunala da hockey IIHF, decis da desdir il turnier.
Pliras variantas
Suenter la decisiun da desdir il campiunadi mundial lavuran tut ils involvids vi da soluziuns. En sasez datti duas variantas: Empruvar da spustar il turnier sin l’auter onn, u alura sin in onn che segua. U d'annullar l’eveniment per dal bun. Per il mument datti discussiun en connex cun in spustament. Pervia ch'il campiunadi mundial da hockey è mintga onn ed ils proxims tschintg turniers èn gia surdads èsi difficil da spustar l’entir project.
Tge far cun bigliets
Ina decisiun stuessi dar la fin dad avrigl. Fin lura lavuran tuts vi da soluziuns. Per tut quels ch'han bigliets per il eveniment grond vaglia: salvar quels. Cun in zichel fortuna restan quels valaivels per in turnier en in onn. Sche la Federaziun internaziunala da hockey avess dentant da decider che l’entir campiunadi vegna annullà senza vegnir remplazzà vegnan ils raps per ils bigliets restituids cumplainamain.
Gia ordavant aveva la Federaziun internaziunala da hockey ditg giu il campiunadi mundial da las dunnas en il Canada.