Dapi che la naziunala svizra da ballape è turnada da la Russia suenter ch'ella è crudada or en l'otgavelfinal stat la Federaziun svizra da ballape en la critica. Lantschà la debatta ha il secretari general dal SFV, Alex Miescher, quai cun expressiuns brisantas. Miescher ha tranter auter tschentà la dumonda sch'ins duai insumma anc laschar giugar en la naziunala svizra giugaders ch'èn burgais dubel. Quai ha fatg ir ina lavina, oravant tut tar ils giugaders pertutgads sco in Granit Xhaka.
Il president da la Federaziun svizra da ballape, Peter Gilliéron, conceda en in scriver ch’els hajan fatg sbagls e sa perstgisa en num dal SFV. La Federaziun svizra da ballape vul uss analisar quai ch’è capità ed era examinar tgi che haja ussa propi tge rolla e saja responsabel per tge funcziun tar il SFV.
RR novitads 16:00