Peter Sagan cun il hattrick istoric

Il ciclist slovac Peter Sagan ha gudagnà aur en la cursa da via als campiunadis mundials a Bergen en la Norvegia. Sagan daventa uschia per la terza giada en seria campiun mundial, insatge ch’era anc mai grategià en l’istorgia da velo. Il Svizzer Michael Albasini daventa 7avel.

Laschar ir video «Der packende Schlusssprint im Kampf um WM-Gold»

Der packende Schlusssprint im Kampf um WM-Gold

1:09 min, dals 24.9.2017

Suenter 267,5 kilometers ha il fotofinish stuì decider. La finala ha il grond favurit Peter Sagan gudagnà be per paucs centimeters il sprint final avant il mattadur local Alexander Kristoff che gudogna uschia argient. La medaglia da bronz va a Michael Matthews da l’Australia.

Ina fitg buna prestaziun ha er Michael Albasini mussà. Il grond trumf svizzer ha en il sprint final schizunt cumbattì per ina medaglia, ha la finala dentant stuì sa cuntentar cun il 7avel plaz. Albasini ha uschia procurà per il meglier resultat svizzer dapi sis onns. Il 2011 a Kopenhagen era Fabian Cancellara daventà quart.

Dimensiun istorica

Peter Sagan è per la terza giada en seria campiun mundial en la cursa da via. Il Slovac è uschia l’emprim ciclist en l’istorgia dal sport da velo che vegn da realisar quest triple. Sagan ch’ha 27 onns aveva gia triumfà il 2015 en ils Stadis Unids e l’onn passà a Catar.