Siglir tar il cuntegn

Header

cuntegn

Naziunal/Internaziunal Piranha cumbatta puspè per il titel

I n’è nagina surpraisa, en il superfinal d’unihockey da las dunnas 2016 vegni tar il duel tranter Piranha Cuira ed l'UHC Dietlikon. Quai è il duel tranter las duas meglras equipas d’unihockey en Svizra, quai gia dapi intgins onns.

audio
Saira: Intervista cun Seraina Ulber, capitani da Piranha Cuira
ord Actualitad dals 28.04.2016.
laschar ir. Durada: 3 minutas 43 Secundas.

In favurit na datti betg en il superfinal da las dunnas. Detagls vegnan a decider il cumbat per il titel da campiun svizzer.

Piranha vul defender il titel

L’equipa grischuna, Piranha Cuira, vul defender il titel da campiun svizzer ed uschia salvar il buccal a Cuira. Per Piranha fiss quai il 5avel titel en seria ed il 6avel dapi il 2010. Malgrà che Piranha ha terminà quest onn la qualificaziun be sin il terz plaz han las giugadras da Cuira mussà en ils playoffs las ambiziuns sin il titel. En la seria da quartfinal ha Piranha battì Zug United cun 3:1 ed en il mezfinal Skorpion Emmental medemamain cun 3:1.

Dietlikon vul far revantscha

L'UHC Dietlikon auda dapi onns tranter la crème de la crème en il sport dad unihockey. Tuttina, il davos titel da campiun svizzer ch’il club dal chantun Turitg ha gudagnà è stà il 2009. Ils davos quatter onns ha Dietlikon adina cuntanschì il final, dentant adina pers quel encunter Piranha Cuira. Quest onn survegn Dietlikon in’ulteriura schanza da far revantscha. En la qualificaziun ha Dietlikon gudagnà en questa stagiun 2 da 3 duels.

Novum tar ils umens

Tar ils umens cumbatta en il final Floorball Köniz encunter GC Unihockey. Igl è il duel tranter las duas equipas ch’han gia dà il final da la cuppa svizra l’entschatta mars. La cuppa aveva Floorball Köniz gudagnà. En mintga cas vegni tar ina premiera, pertge tant Köniz sco er GC n’han anc mai gudagnà il titel da campiun svizzer. Dapi il 1989, pia dapi 27 onns, han sulet trais equipas mintgamai gudagnà il titel, quai èn l’UHC Rot-Weiss Cuira, l’UHC Alligator Malans ed il SV Wiler-Ersigen. Ils Bernais han gudagnà 10 titels ils davos 12 onns ed èn stads ils gronds dominaturs dapi il 2004.

Superfinal a Kloten

Avant in onn ha il superfinal gì premiera a Kloten. Igl è stà ina premiera grategiada. Avant millis fans han ils finalists fatg la meglra reclama per il sport d'unihockey ed er mussà che la Svizra auda tranter las meglras naziuns en l'unihockey. Il superfinal vegn er giugà quest onn en il station da hockey a Kloten avant passa 6’000 fans. Plinavant vegn il superfinal er mussà a la televisiun (SRF2).

  • Final da las dunnas a las 11:45 uras: Piranha Cuira – UHC Dietlikon
  • Final dals umens a las 15:15 uras: Floorball Köniz – GC Unihockey

Artitgels legids il pli savens