Siglir tar il cuntegn

Naziunal/Internaziunal Premiera per il biatlet Serafin Wiestner

Per l’emprima giada insumma è il biatlet da Trin, Serafin Wiestner, nominà per in campiunadi mundial da biatlon. Wiestner è in dad otg biatlets svizzers al campiunadi mundial dals 5-15 da mars a Kontiolahti en la Finlanda.

Il biatlet Serafin Wiestner da Trin vid il trenament da sajettar.
Legenda: Il biatlet Serafin Wiestner da Trin vid il trenament da sajettar. RTR, R. Alig

Il leader svizzer è Benjamin Weger. Il biatlet vallesan ha mussà il davos bunas prestaziuns en la cuppa mundiala, quai che lai sperar sin in exploit al punct culminant da la stagiun.

Benjamin Weger ha ademplì cumplainamain ils criteris da selecziun da Swiss Ski per quest campiunadi mundial. A l’emprova generala mez favrer ad Oslo è Weger vegnì 5avel. En tut è il Vallesan stà classa 5 giadas en ils top 10 en questa stagiun.

Er las duas soras Gasparin, Elisa ed Aita, sco era la giuvna Lena Häcki da 19 onns ch’era vegnida ad Antholz 12avla partan al campiunadi mundial a Kontiolahti. Ad Antholz eran las giuvnas biatletas vegnidas 8avlas en la cursa da staffetta.

Er a la partenza en la Finlanda èn plinavant Flurina Volken, Mario Dolder ed Ivan Joller. Tge atlets che van en tge cursa a la partenza vegn lura decidì al lieu.