Siglir tar il cuntegn

Header

cuntegn

Naziunal/Internaziunal Premiera per Köniz e Casanova

Per l'emprima giada en l'istorgia dal club èsi gartegià a l'equipa bernaisa dad unihockey, Floorball Köniz da daventar campiun svizzer. En il superfinal a Kloten ha Köniz battì il grond rival e defensur dal titel, il SV Wiler-Ersigen cun 5:2.

Cun quest success èsi er gartegià a Floorball Köniz da derscher giu dal tron il grond dominatur dals davos onns. Wiler-Ersigen ha gudagnà ils davos 15 onns gist 11 titels da campiun svizzer. Il success da Köniz va er per ina tscherta part sin il conto d’in Grischun, numnadamain sin quel dad Aldo Casanova da Mustér ch’è dapi quella stagiun trenader assistent a Köniz. Casanova persequitescha ils gieus da Floorball Köniz davent da la tribuna per vesair il gieu ord in’autra perspectiva. Durant las pausas dat el mintgamai vinavant ses inputs al schef-trenader.

audio
Saira: Premiera per Köniz – discurs cun il trenader assistent tar Floorball Köniz
ord Actualitad dals 23.04.2018.
laschar ir. Durada: 3 minutas 1 Secunda.

Dals Desertina Bulls fin tar l’equipa naziunala

Aldo Casanova ha lantschà sia carriera dad unihockey tar ils Desertina Bulls. Suenter avair giugà blers onns activ sco goli tar ils Desertina Bulls a Mustér ha el lantschà sia carriera sco trenader, l’emprim tar ils Bulls, pli tard tar diversas equipas da dunnas en la liga naziunala A. Tranter auter ha Casanova er trenà l’equipa grischuna Piranha Cuira.

Dapi trais onns è Aldo Casanova trenader naziunal tar l’equipa da dunnas U19. Dacurt ha el gist prolungà ses contract sco trenader naziunal per duas ulteriuras stagiuns. Dals 2 fin ils 5 da matg 2018 cumbatta Casanova cun sia equipa U19 als campiunadis mundials a Son Gagl, in dals puncts culminants en sia carriera sco trenader. La Svizra frunta en la fasa da gruppa sin la Slovachia, la Finlanda e la Pologna.

RR actualitad 17:00

Artitgels legids il pli savens