Suenter stuair suttacumber a la Svezia en il mezfinal cun sajettar penaltis, ha la squadra naziunala svizra dad unihockey gudagnà il pitschen final. Al campiunadi mundial en Tschechia ha il team dal trenader David Jansson gudagnà cunter la Tschechia cun 4:2. Il final tranter la Svezia e la Finlanda è questa saira.
Cumenzà ferm – e suenter serrà las ritschas
Avant 16'112 aspectaturs n'han ils Svizzers laschà sentir nagut dad eventualas crisas suenter la terrada cunter la Svezia. L'emprim quart d'ura èn els gia ids en avantatg cun 2 gols. In avantatg ch'i han per part lura pers durant il gieu. Suenter il 3:2 tras Tim Braillard curt avant la fin dal segund terz, ha la defensiva svizra però serrà las ritschas.
Adina bronz
Per la Svizra è quai gia il 12avel campiunadi mundial, e la la settavla giada che la naziunala dad unihockey gudogna bronz. Quasi adina ha la squadra finì il turnier en il pitschen final. Quai cun 2 excepziuns: il 1998 èni vegnids segunds, il 1996 eran els crudads ora pli baud.
RR novitads 16:00