En la 10avla minuta ha Cristiano Ronaldo fatg igl 1:0 per Real Madrid en il «Bernabeu». Igl è stà il 101avel gol da Ronaldo en la Champions League. In record. Real ha cleramain dominà l'emprima mesadad da la partida cunter Atlético. Tant Ronaldo sco er Benzema han be per pauc manchentà il 2:0.
La segunda mesadad ha cumenzà cun blers fouls e paucas schanzas sin omaduas varts. En la 77avla minuta ha Ronaldo pudì profitar d'in sbagl da defensiun da Filipe ed ha sajettà ord radund 10 meters la balla «volley» en il gol. 2:0 per Real Madrid. En l'86avla minuta è gartegià a Ronaldo schizunt anc il 3:0. Real ha er dominà la segunda mesadad da la partida cleramain.
Fin uss n'ha anc nagina squadra pudì defender il titel en la Champions League. Grazia a sia victoria en l'emprim gieu ha Real fitg bunas schanzas da cuntanscher il final da la Champions League e da forsa gudagnar quella per la segunda giada en roda.
Duel cun tradiziun
Il derby madrilen è in'ulteriura ediziun dal final da la Champions League dals onns 2014 e 2016. En omadus finals ha Real gudagnà cunter l'adversari da la citad. Il defensur dal titel Real Madrid è gia per la 7avla giada en roda en il mezfinal, Atlético per la terza giada.
AS Monaco - Juventus Turin
En il segund mezfinal la mesemna frunta Monaco sin Juventus Turin. Ils gieus da return èn l’emna proxima. Il final da la Champions League è alura ils 3 da zercladur a Cardiff en la Valisa.
RR novitads 23:00
