Uschia ha il duo turitgais/bernais segirà il diplom olimpic. Suenter la victoria betg exnum spetgada cunter las campiunessas d'Europa dal 2014 spetga en la proxima runda in pensum tant pli grev. Heidrich/Zumkehr fruntan sin las Brasilianas Larissa/Talita, il numer 1 da la qualificaziun. Ellas duas tutgan tar las grondas favuritas per aur.
Per l'emprima giada dapi il 2004, cura che Stefan Kobel/Patrick Heuscher han gudagnà bronze ed ils frars Laciga èn vegnids tschintgavels, è puspè inagiada in duo svizzer tranter las meglras otg equipas en in turnier olimpic.
Out per Forrer / Vergé-Dépré
L'otgavelfinal è stada la staziun finala per il duo svizzer dal beachvolleyball, Isabelle Forrer ed Anouk Vergé-Dépré, als gieus olimpics a Rio de Janeiro. Cunter las campiunessas europeicas, las Tudestgas Laura Ludwig e Kira Walkenhorst, perdan las Svizras en dus sets. L'emprim set è anc stà pulit equilibrà, cun 19:21. En il segund set han Forrer Vergé-Dépré lura pers il fil e pers cun 10:21.
Ina victoria da las Svizras fiss stada ina surpraisa. Ludwig e Walkenhorst valan sco favuritas per aur, ed han gudagnà quatter dals sis davos turniers da beachvolleyball. Cunter las Tudestgas avevan Forrer e Vergé-Dépré gia pers tar il davos turnier da la World Tour a Klagenfurt.
RR novitads 06:00