Fabian Cancellara stat avant sia ultima cursa olimpica. Cancellara parta a Rio a la cursa encunter l’ura, sia disciplina da parada. Gia 4 giadas è il ciclist da 35 onns stà campiun mundial en quella disciplina e 2008 sco punct culminant campiun olimpic.
Ils gieus da Peking sco punct culminant
Ils gieus a Rio de Janeiro è gia ils quarts gieus olimpics da Fabian Cancellara. Propi grategiai èn mo quels da l’onn 2008, lura dentant oraifer. A Peking è Cancellara vegnì campiun olimpic en la cursa encunter l’ura e vicecampiun olimpic en la cursa sin via.
A Rio èn auters ils favurits
Ina medaglia per la fin da sia carriera olimpica fiss il siemi da Fabian Cancellara. Cuntrari als gieus da Peking na parta Cancellara a Rio betg pli sco topfavurit. Quella rolla han il victur dal Tour de France Chris Froome e l’ollandais Tom Dumoulin ch’è dentant handicapà perquai ch’el ha rut in maun al Tour de France.