Rio 2016 - Kambundji cuntanscha mezfinal dals 200 meters
La curridra svizra Mujinga Kambundji è en il mezfinal dals 200 meters als gieus olimpics da Rio. Ella è currida uschè spert sco anc mai questa stagiun.
Cun 22,78 secundas è Kambundji currida ses meglier temp da la stagiun ed il segund meglier en sia carriera. Kambundji è vegnida terza en sia precursa. Quai ha tanschì per vegnir vinavant sco «Lucky Looser». Il mezfinal è la notg sin mesemna.
