Siglir tar il cuntegn
Inhalt

Naziunal/Internaziunal Russia dastga tuttina participar a Rio - però betg tutTAs

La delegaziun russa dastga far part als gieus olimpics a Rio de janeiro. Quai ha decidì il comié executiv dal comité olimpic internaziunal. La decisiun, sche atletas ed atlets dastgian far part saja chaussa da las diversas federaziuns da sport naziunalas.

bandieras da la russia e da l'olimpica
Legenda: La delegaziun russa dastga ussa tuttina far part als gieus olimpics a Rio. Keystone

En ina conferenza da telefon ha il comité executiv sut l'egida dal president Thomas Bach decidì da betg sclauder totalmain ina entira naziun dals gieus olimpics. La delegaziun russa dastga uschia da princip far part als gieus. Schebain atletas pon ubain na pon betg far part, duain las differentas federaziuns da sport internaziunalas decider en collavuraziun cun il Tribunal internaziunal da sport (CAS). Tuttina stoppian però tut ils atlets da la Russia ademplir cundiziuns rigurusas, ha ditg Bach.

En l'atletica leva resta la Russia però sclaussa

La Russia saja cuntenta cun la decisiun,m ha ditg il schef da la delegaziun da sport Dimitri Swischtschjow. Quai era sche la decisiun dal Tribunal internaziunal da sport vala anc adina per la squadra russa da l'atletica leva. Lezza resta sclaussa dals gieus olimpics a Rio.

Talas decisiuns stuvessian però valair per atletas ed atlets dad tut ils stadis, ha ditg Swischtschjow, e betg mo per la Russia. En quel connex aveva il schef dal Kreml Wladimir Putin annunzià da fundar ina nova cumissiun d'anti-doping en Russia. Eventualmain che quai ha gidà d'evitar in scumond da tut las atletas ed atlets russ per ils gieus olimpics a Rio.

Doping sistematic statal en Russia

En il rapport d'investigaziun aveva l'agentura mundiala cunter il doping (WADA) constatà, ch'i haja dà doping sistematic ordinà tras il stadi en la Russia. E quai betg mo en l'atletica leva. Suenter la publicaziun dal rapport da la WADA aveva il manader dal labor anti-doping a Moscau, Gregori Rodschenkow, demissiunà.

Pauc chapientscha per la decisiun dal IOC

La decisiun dal Comité internaziunal olimpic IOC da betg excluder dal tut la Russia dals gieus olimpics a Rio de Janeiro chatta pauc chapientscha. El saja surstà, trumpà e grittentà, ha ditg Jörg Schild, il president da Swiss Olympic. E per il president da l'uniun tetgala da 59 agenturas naziunalas anti-doping Joseph de Pencier èsi in trist di per il sport schuber. Cuntenta cun la decisiun dal IOC è percunter la Russia.

RR novitads 17:00