Siglir tar il cuntegn

Naziunal/Internaziunal Sagan gudogna avant Froome

Il slovac e campiun mundial Peter Sagan ha gudagnà la 11avla etappa dal Tour de France sur 162,5 kilometers da Carcassonne a Montpellier. Per Sagan ch’era anc vegnì il di avant segund èsi gia la secunda etappa ch’el gudogna al Tour de France 2016.

Peter Sagan e Chris Froome
Legenda: Il campiun mundial Peter Sagan batta il leader dal Tour de France Chris Froome en il sprint final da la 11avla etappa. Keystone

Peter Sagan ha gudagnà a Montpellier il sprint final d’ina gruppa da quatter. Tranter quai quartet ch’è vegnì da scappà da la gruppa principala bun 12 kilometers avant l’arrivada sa chattava er il leader Chris Froome. Il Brit è la finala vegnì segund.

Froome vinavant en il maillot jaune

La gruppa principala cun il rest dals favurits ha cuntanschì l’arrivada cun in retard da 6 secundas. Grazia al segund plaz e las secundas da bunificaziun ha Chris Froome pudì augmentar l’avantatg a la testa dal classament generala. Froome maina suenter 11 da 21 etappa cun in avantatg da 28 secundas sin ses cumpatriot Adam Yates. Terz cun in retard da 31 secunda suonda l’Irlandais Daniel Martin. Il grond rival da Froome en il cumbat per la victoria al Tour de France da quest onn, il Columbian Nairo Quintana, è quart cun in retard da 35 secundas. Meglier svizzer è Sébastien Reichenbach sco 19avel cun in retard da 6.37 minutas.

Mont Ventoux

La 12avla etappa da gievgia maina sur 184 kilometers da Montpellier sin il Mont Ventoux sin 1’912 meters sur mar. Il Mont Ventoux vala mintgamai sco in dals pli populars e spectaculars culms al Tour de France.