Feuz gudogna la segunda medaglia d'aur per la Svizra, quai cun in avantatg da 12 tschientavels sin il Canadais e campiun mundial dal super-g Erik Guay. Bronz va a l’Austriac Max Franz.
Il titel da campiun mundial en la cusa rapida resta cun la victoria da Feuz en mauns svizzers: Avant dus onns aveva Patrick Küng triumfà, bronz era lura ì a Feuz. Il skiunz da l'Emmental è l'11avel campiun mundial svizzer en la cursa rapida.
Küng manchenta be per pauc ina medaglia
Er al defensur dal titel Patrick Küng è gartegià ina ferma cursa. Küng ha manchentà il podest per be 2 tschientavels. Ensemen cun il Norvegiais Norvegiais Kjetil Jansrud è el vegnì quart.
Il Grischun Mauro Caviezel è vegnì 21avel, Nils Mani 23avel. Carlo Janka ch'è partì sco emprim n'ha gì nagina schanza ed ha stuì sa cuntentar cun plaz 28.
Nagin «freefall»
La cursa ch'aveva stuì vegnir spustada per in di pervi da la tschajera n'ha betg pudì vegnir fatga sin il traject original. Uschia n'hai dà nagina partenza dal «freefall».
Ils top 10 da la cursa rapida
Rang | Num | Naziun | Temp |
---|---|---|---|
1 | Beat Feuz | SUI | 1:38.91 |
2 | Eric Guay | CAN | + 0.12 |
3 | Max Franz | AUT | + 0.37 |
4 | Patrick Küng | SUI | + 0.39 |
5 | Kjetil Jansrud | NOR | + 0.39 |
6 | Aleksander Kilde | NOR | + 0.49 |
7 | Bostjan Kline | SLO | + 0.52 |
8 | Andreas Sander | GER | + 0.56 |
9 | Peter Fill | ITA | + 0.65 |
10 | Brice Roger | FRA | + 0.82 |
RR novitads 15:00