Er tut las autras skiunzas svizras sco er ils skiunzs svizzers sa legran sin la gronda festa da skis davant ils fans da chasa. Durant l’entira stagiun stat quest punct culminant en il center.
Mintgin dad els vul mussar la meglra prestaziun pussibla durant las proximas duas emnas e cumbatter per ina u l’autra medaglia. Squitsch supplementar na saja quai betg manegian ils Svizzers en globo, anzi, dastgar partir a chasa saja ina motivaziun supplementara.
Lara Gut en il center da l’interess
In di avant la festa d’avertura èn skiunzas e skiunzs svizzers sa preschentads l’emprima giada avant las medias. Cun tensiun è vegnida spetgada Lara Gut en l’hotel Kempinski, l’hotel nua ch’ils Svizzers èn da chasa durant quests campiunadis mundials.
L’interess per Lara Gut è stà immens. Medias ord l’entira Europa han vulì udir tge che la skiunza tessinaisa ha da raquintar avant las emprimas cursas. Ina surpraisa che tants schurnalists han vulì insatge da Gut n’èsi sa chapescha betg.
La giuvna skiunza da 25 onns n'è betg mo il grond trumf svizzer, ma er ina da las top favuritas e quai gist en pliras disciplinas. Per Lara Gut èn las cursas a San Murezzan er tut spezialas, pertge sin questa plaunca ha ella lantschà cun 17 onns sia carriera.
Plirs candidats da medaglia
Sper Lara Gut sto oravant tut Wendy Holdener avair la finamira da gudagnar ina medaglia. En sis da set slaloms è Holdener numnadamain stada sin il podest en questa stagiun.
Tar ils umens ha Beat Feuz las meglras cartas. Il Bernais è en furma ed ha er gudagnà al final da skis avant in onn tant il super-g sco er la cursa rapida, pia las emprovas generalas.
Cun Carlo Janka en las disciplinas spertas sco er en la super-cumbinaziun e cun Justin Murisier en la super-cumbinaziun han anc dus ulteriurs svizzers bunas schanzas sin in plaz da podest.
Emblidar na dastg’ins er betg Daniel Yule en il slalom e Fabienne Suter en la cursa rapida.