Siglir tar il cuntegn

Header

Navigaziun

Skiunz.
Legenda: Sandro Simonet avant la cursas dad Adelboden. Keystone
cuntegn

Naziunal/Internaziunal Sandro Simonet – Adelboden per la terza

Sandro Simonet parta puspè tar il slalom dad Adelboden. La terza giada duessi gartegiar cun la qualificaziun per il segund percurs.

Il giuven skiunz Sandro Simonet parta dapi trais stagiuns en la cuppa mundiala da skis. Uschia è el era gia per la terza giada a la partenza al slalom dad Adelboden. Suenter ch'il skiunz da Casti ha manchentà dus giadas la qualificaziun per il segund percurs, duessi questa dumengia reussir. Simonet è en furma e motivà da far questa giada il pass tranter ils megliers trenta dal slalom per sa qualifitgar per il segund percurs.

Pli constant questa stagiun

Avant questa stagiun ha Sandro Simonet formulà la finamira da vegnir durant quest enviern anc pli constant. Durant la stagiun passada n'è il skiunz grischun da 23 onns savens betg stà en il segund percurs u ch'el è lura crudà ora. Durant quest enviern è la quota da las crudadas pli pitschna. Gia duas giadas è Sandro Simonet vegnì en la arrivada. Ina 26avla ed ina 14avla plazza resultan da quellas cursas.

Motivà da mussar ina ferma prestaziun

Las cursas da chasa ad Adelboden èn per mintga skiunz svizzer insatge fitg spezial. Las cursas pretensiusas sin il «Chuenisbergli» procuran adina per spectacul ed attiran uschia era numerus fans dal sport da skis. Durant ils ultims onns han adina visità passa 40’000 persunas las cursas legendaras al «Chuenisbergli». Quest on spetgan ils organisaturs 44’000 fans durant ils dus dis da las cursas.

RR actualitad 17:00