Siglir tar il cuntegn

Naziunal/Internaziunal Schef d’Antidoping Svizra è trumpà dal IOC

Malgrà numerus mussaments da doping statal astga la Russia tuttina sa participar als gieus olimpics a Rio. Per quella decisiun Comité Olimpic Internaziunal ha il schef d’Antidoping Svizra Matthias Kamber nagina chapientscha.

Matthias Kamber
Legenda: Matthias Kamber, schef d'Antidoping Svizra. Keystone

Kamber vess spetgà sancziuns severas

Chastis collectivs na sajan betg fairs, quai è l’argumentaziun principala dal IOC. Quel surlascha la decisiun tgi ch’astga parter a las diversas federaziuns internaziunalas da sport. Premissa è ch'els cumprovan dad esser schubers. Co quai duai funcziunar en uschè curt temp è in misteri per Matthias Kamber. Ils gieus olimpics a Rio cumenzan gia ils 5 d’avust. Kamber vess spetgà sancziuns severas per proteger uschia ils sportists schubers.

Il curaschi da Stepanova na vegn betg onurà

Era nagina chapientscha ha il schef d’Antidoping Svizra che la curridra russa Julia Stepanova vegn sclausa dals gieus. Stepanova ha fatg part durant onns dal sistem russ da doping. Ella ha lura dentant rapportà da quai ed ha uschia scuvrì il scandal.

Julia Stepanova
Legenda: Julia Stepanova, la curridra russa na dastga betg ir a Rio. Keystone

Avant curt veva il IOC anc vulì onurar il curaschi da Stepanova e veva empermess ch’ella astgi prender part als gieus a Rio. Ch'il IOC ha uss revocà questa decisiun è per Matthias Kamber in faus signal. Quai n’intimeschi betg auters sportists da gidar a scuvrir ulteriurs scandals da doping.