Durant trais dis cumbatta la giuvna elita mundiala dal sport da bob e skeleton a San Murezzan per titels e medaglias. En il pli vegl chanal da glatsch dal mund vegni a dar in spectacul sin schlusigls. Circa 140 atletas ed atlets da 20 naziuns èn da la partida tar il campiunadi mundial. Las cursas en il lieu istoric a San Murezzan èn il punct culminant da l’entira stagiun.
Era pilots indigens a la partenza
Tar las concurrenzas da bob parta il pilot Cédric Follador da Bever gest tar las cursas cun il bob a duos, dentant era cun la schlitta gronda, il bob a quatter. Per Follador è il campiunadi mundial ‘a chasa’ la davosa schanza da mussar bunas prestaziuns. Cun 26 onns po el sa participar per la davosa giada tar ils juniors. Sin la schlitta da skeleton va Sara Schmied da Schlarigna a la partenza. La giuvna da mo 15 onns è sa qualifitgada grazia a bunas prestaziuns en la cuppa d’Europa per l’eveniment en Engiadina. La finamira da la giuvna è da cuntanscher in plazza tranter las meglras diesch en la categoria sut 20 onns.
Tuts en in vaschia
Per garantir la segirezza tar il campiunadi mundial da juniors a San Murezzan èn tut las atletas e tut ils atlets, dentant era il gidanters, vegnids tramess en ina vaschia. Per entrar en quella han ins stuì far in test da labor da corona. Silsuenter èn tuts vegnids testads adina puspè sin ina pussaivla infecziun dal virus. Fin a la fin dal campiunadi mundial duess quai dar 1’400 tests. Uschia emprov’ins da garantir dad chattar dalunga ina pussaivla infecziun.